nenkryetari-i-beogradit:-s’me-lane-te-futem,-do-ta-paraqes-kosoven-ne-gjykaten-e-strasburgut
S

Nënkryetari i Beogradit: S’më lanë të futem, do ta paraqes Kosovën në Gjykatën e Strasburgut


Nënkryetari i Komunës së Beogradit, Goran Vesiç, njoftoi sot se do të paraqes një padi në Gjykatën e të Drejtave të Njeriut në Strasburg, pasi nuk iu lejua hyrja në Kosovë.

Vesiç deklaroi se ai pret që gjykata të thotë nëse lejohet ndalimi i lëvizjes së njerëzve në Evropë.

Ai përsëriti për TV Pink se ai u ndalua të hyjë të hënën në Kosovë për shkak se sipas autoriteteve kosovare ishte “rrezík për sigurinë”.

Ai tha se arsyeja pse dëshiroi të vinte në Kosovë ishte që të nënshkruanin një statut për binjakëzimin e Mitrovicës së Veriut me Beogradin.

Vesiç tha se nëse do t’iu kishte lejuar hyrja në Kosovë ai do t’i kishte vizituar punimet në ndërtesën e banimit në Mitrovica e Veriut për strehimin e 20 familjeve refugjate që sipas tij, kanë jetuar në strehim kolektiv për më shumë se 10 vjet, si dhe në ndërtimin e një parku dhe shesh lojërash të financuar nga Beogradi.

“Mesazhi i Prishtinës për serbët në Kosovë është se fëmijët serbë nuk kanë të drejtë në park dhe shesh lojërash, dhe se serbët nuk kanë të drejtë në apartamente. Prishtina nuk më ndaloi mua, por Qytetin e Beogradit. Kjo është një shkelje e Marrëveshjes së Brukselit.

Kjo tregon më së miri pse ata nuk lejojnë formimin e JCC, sepse serbët nga Kosova do të bashkëpunonin me të gjithë botën, jo vetëm me Beogradin”, tha Vesiç, raportoi Tanju, transmeton Gazeta Express.

Ai deklaroi se bashkëpunimi midis qyteteve po promovohet në BE, dhe se Prishtina dje u përpoq të parandalojë bashkëpunimin midis Beogradit dhe Mitrovicës së Veriut.

“Është një politikë që ne duhet të krijojmë pasiguri të vazhdueshme dhe të krijojmë kushte që serbët të largohen nga Kosova.. Kjo politikë zbatohet nga Lidhja e Prizrenit. Nëse Hoti do të donte të ndërtonte një shesh lojrash në Preshevë, ne nuk do ta kishim penguar atë, sepse ne mendojmë se edhe fëmijët serbë edhe ata shqiptarë duhet të kenë një shesh lojërash ”, deklaroi Vesiç.

Një delegacion nga Beogradi që udhëhiqej nga nënkryetari i komunës, Goran Vesiç u ndalua dje rreth orës 09:30 në Jarinje nga Policia e Kosovës. /Express/

Related Posts

Leave a Reply

Your email address will not be published.